Wo mni

Annabell Wandelt

Sym Annabell Wandelt a pochadźam z Měrkowa w Radworskej gmejnje. Hižo w młodych lětach zajimowach so jara za wšitko wokoło temy smjerć, žarowanje a chowanje. W zažnej młodosći mějach strach před tym a so bojach, so temy smjerć bližić. Mojej staršej wobhladujetaj sej rady pohrjebnišća we wšelakich městach a krajach. Dokelž nochcych jako 14lětna holca w cuzych krajach samalutka před kěrchowami stać a čakać, dźěch z nimaj sobu. Přemóžena wo wotewrjenosći napřećo tutej temje, wšelakich kulturow a mnohotnosći pisanych kwětkow rozsudźich so, šulerski praktikum wosmeho lětnika w pohrjebnym instituće přewjesć.

Po dweju tydźenjach praktikuma bě za mnje jasne: “Nochcu ničo druheho činić.” Tak započinach w septembrje 2019 swoje wukubłanje k fachowči za chowanja na powołanskej šuli w Bad Kissingen, na akademiji Münnerstadt a w dwěmaj wukubłanskimaj předewzaćomaj. Zakónčich wukubłanje wuspěšnje w lěće 2022.

Chcych hižo přeco něšto abo mnoho hinak činić, z wjace wotewrjenosću a přećelnišo tworić a to tež na polu kultury chowanja. Tak spytam swój són zwoprawdźić a koncentruju so wot zakónčenja wukubłanja sem połnje a cyle planowanju a přihotam swójskeho pohrjebneho domu. Napinace tydźenje leža za mnu. Sym mnohe rozmołwy wjedła, w kotrychž sym swoje ideje a sebje samu dyrbjała zakitować, přetož njeje samozrozumliwe, jako młody čłowjek dóstać tajku móžnosć. Próca pak je so wudaniła. Nětko steju tu, ze swójskim předewzaćom, w kotrymž móžu swoje předstawy a sony zwoprawdźić. To mje wozboža a sym dźakowna, zo sym tutu móžnosć dóstała!

Wjeselu so na wšitko to, štož hišće přińdźe a wjeselu so na to, tež snano Was na ćežkim puću směć přewodźeć!

Annabell Wandelt